اختار صح، اختار الشخص الكفو

شوف، قلبك يا صديقي رهيف وأمانة في عنقك فلما تقرر إنك تعطيه لأحد على طبق من ذهب تأكد إنك اخترت صح. تأكد إنك اخترت الشخص الي راح يسوي كل الي يقدر عليه عشان يكون معك. تأكد إنك اخترت الشخص إلي راح يقدر قلبك والأهم من هذا كله إنه راح يحترم الأمانة إلي أعطيتها له. ماودك في نهاية اليوم تعطي قلبك للشخص الغلط إلي يكسره لك أو يتخلى عنك عند أول مطب. اختار الشخص إلي راح يكون قد الكلام والأمانة وما يتراجع عند أول مطب في هذي الدنيا. شوف أنا عدت هذي العبارة مرتين لأنها مهمة ولأنها راح تجنبك آلام كثيرة إنت في غِنى عنها صدقني.

أنا اخترت، وعطيت قلبي لشخص اعتقدت إنه كفو وقد الأمانة، وعند أول مطب هالشخص قال لي يا علي أنا مو قد هالمعركة وكانت النتيجة كارثية بكل ما تعنيه الكلمة من معنى. الاختيار الي سواه ماكنت أنا متوقعه ولا كنت متخيله حتى في أسوأ كوابيسي. والآلام الي لحقت هذا الاختيار الي فاجئني كانت غير متوقعة وما عمري في حياتي مريت فيها قبل. تعرف لمن توصل للقاع من الاحباط والاكتئاب والقلق؟ أنا أرجو الله عز وجل إنك ما تمر بما مررت فيه أنا. في نهاية اليوم ماتقدر تجبر أحد على أي شي، ماتقدر تجبر أحد يكون معك حتى لو إنت تصرفت وفق ما تقتضيه أصول اللياقة والشهامة والأعراف لأن في نهاية المطاف النَّاس راح تختار نفسها أولًا وراح تختار وفق مبادئها ومعتقداتها، فلذلك خليك حريص لمن تفكر تعطي قلبك لأحد.

أنا لا قدر الله ما بقول خليك أناني وفكر في نفسك أولًا، لا طبعًا لكن لمن تدخل في خط علاقة وزواج تأكد إنك اخترت الشريك الصح، الي يشابهك في معتقداتك ومفاهيمك ومو شرط يكون نسخة منك طبعًا. لكن لا تختار أحد لمجرد أنه الخيار المتاح، ولا تعطي أحد أكبر من حجمه لأن صدقني محد يستاهل. راح تعطي الناس أكبر من حجمها وراح تخيب ظنك عند أول مطب.

لمن تفكر تختار شريكة حياتك، اختار الشخص الي راح يسوي إلي يقدر عليه عشان يستمر إلي بينكم، اختار الشخص الي راح يستثمر في هذه العلاقة قد ما انت راح تستثمر وأكثر بعد، لا تكون في علاقة مع أحد ومافيها توازن لأن الخلل في التوازن راح يولد الكثير من المشاكل في المستقبل. اختار الشخص الي راح يقاتل عشانك في كل مرة، اختار الشخص الي راح يقاتل عشانكم في كل مرة، اختار الشخص الي راح يقاتل عشانك أعطيته أعز ما تملك، قلبك. اختار الشخص الي راح يفكر ألف مرة قبل لا يكسر لك قلب يا صديقي. اختار الشخص الكفو لأنك تستاهل شخص كفو ولأن قلبك أمانة في في عنقك.

إذا اخترت خطأ، وأعطيت قلبك للشخص الخطأ، تحمل الي راح يجيك من احباط واكتئاب وقلق وحزن، راح تكره الدنيا وما فيها وراح تبكي وراح تنعزل عن الناس، يمكن تفقد عقلك ومصدر رزقك ويمكن تتجه للأدوية والعلاج حتى تتعالج وهذا كله ليش؟ عشانك أعطيت قلبك للشخص الي مب كفو.

لا تعطي قلبك لشخص مب كفو، لأن الشخص هذا راح يكسر لك قلبك ويختار نفسه عند أول مطب تمرون فيه في هذي الدنيا العجيبة.

محدثكم إلِّي أعطى قلبه لشخص مب كفو، وشكرًا.